انا نبي
لكن ناقصني الرسالة
وشعب زيي غبي
يشبهني وحثالة
اسأل يجيب مطلبي
اعمل عليه حالة
ينزل يبوس شبشبي
ويمسح الصالة
يا حلوة تسبسبي
راجعة ورحالة
تتهيأي للصبي
معدش رجالة
***
اكتب ياواد قصتي
واحدفني بحوالة
وفي أي دار أجنبي
ارميلهم الحالة
ويادنيتي العبي
وهاتيلي حصالة
ارمي الضمير انهبي
العم والخالة
وفي كل ريح اضربي
ودافعي ببسالة
***
انا نبي
لكن ناقصني المعجزات
المنجزات
المعجبين
وأهم حاجة المعجبات
وقصص غريبة
خزعبلات
وحاجات كتير
ماهيش عيوب
ومش ميزات
***
انا نبي
بس المريدين اختفوا
مبقوش خلاص يتلهفوا
علي طلعتي وطلتي
من جنب داري يهفهفوا
معرفش فين راحوا الكلاب
اطفال كبار عواجيز شباب
وازاي ولاد الارملة
عن حضرتي يتخلفوا
متخلفين متصلفين
ومحتاجين كتير عبر
وكتير عظات
***
انا نبي
من غير بشارة
ولا كتب
ولاحسب ولا نسب
ولا عمر وابو لهب
ولا اشارة
ولاعلوم ولا استنارة
انا رسولكم بالاشارة
وبالرضا او بالغضب
هي كدة
بالفهلوة وبالشطارة
وساعات بقلة الادب
***
انا نبي بالميكرفون
والبهرجة والساكسفون
وباللمض وبالنيون
اصرخ وخلفي يهتفون
عاش النبي
يحي النبي
وميعرفوش
انا مش نبي
انا زيهم
واحد غبي
في دنيا مليانة حكايات
يشيب لها اصغر صبي
عن أكلين مال النبي
بعد الصلاة علي النبي
بقلم الشاعر / علي ابراهيم
Leave a Reply