فاروق جعفر: رجال الأعمال دمروا الاندية . ومرتضى فاشل

سبتمبر 26, 2023

Read Time:1 Minute, 33 Second

كتب باسل فهمي

فتح فاروق جعفر المرشح لرئاسة مجلس إدارة نادي الزمالك النار على مرتضى منصور الرئيس المعزول من رئاسة النادي مهما اياه بالفشل في تحصيل غرامة كهربا او إيقاف اللاعب لحين السداد، وهاجم رجال الأعمال متهما اياهم بأنهم السبب في تخريب الأندية مستشهدا بتجربة الإسماعيلي وفترة محمود طاهر في الأهلي.

واضاف جعفر في تصريحات لبرنامج بلس 90 الذي يقدمه أمير هشام : لازم الجماهير تفهمني صح لم أقصد بتقسيط غرامة كهربا خدمة اللاعب بل أقصد مصلحة الزمالك في المقام الأول

وتابع: بنجري ورا كهربا من 2019 خدنا ايه؟ لازم الكل يبقى واقعي الأهلي مش هيساعد كهربا بحاجه وهو اللي هيدفع

مشيرا الى ان رئيس النادي السابق ودي شغلته معرفش يجيب منه فلوس واللاعب مبيتوقفش يبقى أضيع أنا الفلوس.. أنا ميهمنيش اللاعب يتوقف ولا لا أنا يهمني الزمالك

وواصل جعفر: لما تقسط وناخذ ضمانات يبقى أنا كدا هستفيد ماديا وهاخد فلوسي لكن لمًا نخلي الوضع زي ما هو يبقى كدا أنا مش مستفيد حاجه

واستطرد “ملك النص”: اللعبة الوحيدة اللي مش واخده حقها في النادي حاليا هي كرة القدم ودي كارثة كبرى والقيد بتاع الفريق واقف ومش عارفين نجيب لاعب نقيده

واكد بقوله : اللي يمسك الزمالك مش لازم يكون معاه فلوس بس لا لازم يكون شقي في النادي وتعب وعارف قيمته كويس

وتابع :النادي الأهلي على مر التاريخ من يتولوا رئاسته ويحققوا بطولات نجوم كرة من صالح سليم لعبده صالح الوحش لحسن حمدي لمحمود الخطيب، الفترة الوحيدة اللي محققش فيها الأهلي بطولات كان متولي النادي رجل الأعمال محمود طاهر والجميع حارب من اجل عودة رجال الكرة مرة أخرى

واشار: الإسماعيلي تم تدميره منذ تولي رجال الأعمال رئاسة النادي ولو لم يتواجد رجل قادر على الإنفاق النادي بيعاني

واكد: على الجميع أن يعرف نادي الزمالك قلعة رياضية الأولوية الأولى الكرة اللي الناس شجعوه عشنها وبعدها هناك رياضات أخرى، وان هناك ترابط حاليا بين جميع الأسر داخل نادي الزمالك ودعم أسرة كرة القدم اي على رأسي وحسن شحاتة دائما معي داخل النادي.