رفض وظيفة بمرتب خيالي من اجل والده.. عبد المحسن سلامة : انا صنيعة ربنا
Read Time:1 Minute, 44 Second
كتبت _ بسملة علي
كشف الكاتب الصحفي عبد المحسن سلامة، عن رفضه لفرصة عمل مغرية وبمرتب خيالي، في مقتبل حياته الصحفية، في دولة الكويت، من اجل ان يبقى بجوار والده.
وقال عبد المحسن سلامة عضو المجلس الأعلى للإعلام، والمرشح نقيبا للصحفيين، لبرنامج (كلم ربنا .. مع أحمد الخطيب) على الراديو 9090: “وفاة والدي هي اللحظة الأصعب في حياتي لأنها كشفت ضهري خاصة إن أنا الولد الوحيد علي 4 بنات وأنا أصغرهم!
وأضاف “سلامة ” : كنت عايش تحت رجليه، وكان فلاح بسيط ، مكنش ليا غيره في الدنيا ودخلت واتعينت في الأهرام بدون واسطه ولا معرفه!
وتابع: ” فى بداية حياتي وزير صديقي جابلي فرصة عمل خُرافيه في الكويت وهي مستشار صحفي في الديوان الأميري والوظيفه دي كانت بمرتب خيالي وحلم لأي صحفي بيبدأ حياته.
وأوضح:”فِرحت جدا وكنت طاير م الفرح ، رحت كلمت أبويا وأنا فرحان، وأول ما حكيتله دموعه نزلت، وقال لي: مبروك ياولدي .. روح”
وتابع: “لاحظت انه كان بيخبي دموعه مني وكأنه عاوز بيقوللي “متسبنيش” .. مشيت من عنده وأنا حزين وفرحتي ماتت، لكن يومها قررت أرفض السفر !
واردف رئيس مجلس إدارة الأهرام السابق: “لما بلّغت صديقي الوزير بقرار رفض السفر علشان أبويا ، رد عليا وقاللي: “اللي عملته ده هتلاقيه في حياتك”
واستطرد: “الأيام والدنيا أعطتني فوق أحلامي بسبب رضا أبويا واتعوضت عن حلم السفر والوظيفه .. نجحت في الأهرام وفي كل مكان اشتغلت فيه، لحد ما وصلت رئيس مجلس ادارة الأهرام وبقيت نقيب الصحفيين كمان ، كل ده مكنش ممكن يحصل لو أنا سافرت الكويت، لكن لأني إخترت رضا أبويا فربنا رضاني !
وأشار بقوله :”أنا لحد دلوقتي ساكن في قريتي في قليوب، علشان علاقتي بأهلي وعيلتي متغيرتش .. كل نجاح وصلتله هو بفضل رضاهم ودعواتهم، وربنا اللي عمره ما خذلني”.
وأضاف: “اتعلمت في ظروف مكنتش سهلة، كنت الأول على مدرستي، والأول على المحافظة، وكان حلمي أدخل الإعلام، ولما قدمت في مؤسسة الأهرام، دخلت من غير أي وسايط، طول الرحلة دي بكلم ربنا وأقوله “إنت ضهري وسندي”، وكان كريم معايا جدًا، والأبواب اللي كانت مقفولة اتفتحت، أهلي الغلابه في القرية دايما بيقولولي: “اللي إنت فيه ده بركة رضا أبوك وأمك عليك”
واتم بقوله:”أنا شايف نفسي “صنيعة ربنا” ، ومش مجرد كلام بقوله، دي حقيقة بحسها في كل خطوة في حياتي”.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating