صور “توم هانكس” في احد المطاعم المصرية تشعل غضب رواد مواقع التواصل

أبريل 25, 2023

Read Time:2 Minute, 57 Second

كتبت _ بسملة علي

اشعلت الصور والفيديو المنتشر للنجم العالمى توم هانكس خلال زيارته لمصر وقيامهم بتناول الطعام في أحد مطاعم الزمالك غضب واستهجان كثيرين على منصات التواصل الاجتماعي، متهمين وزارة السياحة بالتقصير من استثمار تلك الزيارة في الدعاية للسياحة المصرية والتي كانت ستوفر على الدولة ملايين الدولارات في الدعاية، لو كانت استغلت وجود هذا النجم على الأراضي المصرية.

وكتب “عبد الوهاب خليل” متسائلا: “فين وزارة السياحة؟
“تداول صور وفيديوهات علي مواقع التواصل للنجم العالمى توم هانكس وزوجته بأحد المطاعم في منطقة الزمالك القاهرة. اين وزارة السياحة. ولماذا لم نستثمر وجود هذا النجم الكبير للدعوة بالسياحة في مصر”.

اما “محمد راجح” فعلا بقوله:”يا جدعااان … حد يقول لوزير السياحة إن توم هانكس بقاله يومين فى مصر و قاعد بياكل ملوخية فى مطعم ف الزمالك.”
وقال آخر :”توم هانكس عندنا وبياكل ملوخية و ارانب في ابو السيد في الزمالك ومسافر الاقصر انهارده الله الله يارب هيئه تنشيط السياحه تستفيد من وجوده”.

اما “رانيا فهمي” فسارت عكس التيار وكتبت:” توم هانكس حبيب قلبي منور ام الدنيا الناس شافت الصور كالعاده نزلت شتيمه في بتوع السياحه معلش يعني الرجل جاي يتفسح في زياره عائليه وشخصيه تفتكرو فيه مسئول يجرؤ يقتحم خصوصيته، لوكان جاي بدعوه هيبقي بزنس. وساعتها نتكلم انما هو موجود فعلاً واكيد جاء يزور بلدنا عشان عندنا ناس شغاله خلت مصر recommended بالنسبه له لا ايطاليا مثلاً ولا اليونان ولا قبرص ولا المدعووووقه طوووركيا .. بطلوا بقي اسلوب انكوا اللي بتفهموا والدوله مبتفهمش ده ولازم نغلطهم ونعدل عليهم”.

فيما أنكر “عادل عبده” أن يكون هذا هو النجم العالمي وكتب:” انتشرت هذه الصوره علي السوشيال ميديا والمواقع تقولك ، توم هانكس في احد مطاعم الزمالك بياكل ملوخيه ، وطبعا ولا توم هنكس ولا بتنجان ، هذا ليس توم هانكس ، مجرد واحد شبهه وليس له علاقه بالحقيقه ولو كبرت الصوره شويه هتلاقيه بعيد تماما عن شكله
وتلاقي ناس عماله تقولك تحيا مصر وبطيخ ، بلاش هيافه وكلام فارغ ، توم هانكس ايه وملوخيه ايه وفي مطعم الطبليه ، كمان شويه يقولك توم هانكس بيقول انه بيحب ابوتريكه الخلوق امير القلوب وشايفه احسن من محمد صلاح زي احمد داش مابيقول …كفايه
الببغائيات الفيسبوكيه”.

وكتبت “علا السعدني” تستنكر تجاهل زيارة نجم بحجم “هانكس” وكتبت :”وبما ان توم هانكس عندنا وبيتعشي ملوخية ، فكان نفسي اقوله يامرحبا يا مرحبا
تخيلوا ياجماعة ان مجرد فيديو مدته دقايق يتم تداوله منذ ساعات قليلة ، ثم نكتشف من خلاله وبالصدفة البحتة اه والله العظيم بالصدفة البحتة فعلا نكتشف ان الفيديو للفنان العالمي الكبير جدا والشهير جدا توم هانكس ، وماادراك من هو توم هانكس ، فهو مش بس مجرد نجم عالمي كبير ولا شهير ، لا ده هو واحد من اهم اهم نجوم هوليوود ومعشوق جماهير العالم بما فيه عندنا في مصر ، ده غير انه حاصل علي الاوسكار احسن ممثل مرتين علي التوالي ، الاول كان عن فيلم فلادلفيا ، والسنة اللي بعدها حصل عليه مرة تانية عن الفيلم الرائع فورست جانب ، وبكده يكون أول شخص يقوم بهذا الانجاز خلال خمسين عامًا
المهم يعني ان هذا النجم الشهير نعرف بوجوده في مصر بالصدفة
وانه راح مطعم ابو السيد في الزمالك مع زوجته واصدقاءه واتنالوا العشاء هناك وبالامارة اكلوا ملوخية كمان !!
واللي يحزن مش بس انه مفيش اي جهة مصرية رسمية كانت علي علم بزيارة الضيف الكبير ، لا ده لغاية دلوقتي محدش عارف اذا لسه موجود في مصر ولا سافر ؟ ولو لسه هنا ياتري هو مكان اقامته فين ؟
علي اي حال وكالعادة مش هنلاقي اي اجابة ، وكالعادة برضه هتكون راحت علينا فرصة الدعاية اللي لاتقدر بتمن لو كنا استغلينا الفرصة وبروزنا الزيارة ، لكن ازاي ده هيحصل واعلامنا مش مهتم غير بجعفر العمدة ومرتاته ومن هم علئ شاكلتهم وتفاهتهم”.