الحوار الوطني.. صورة حزينة!!

مايو 5, 2023

Read Time:1 Minute, 27 Second

الحوار في الأساس وسيلة تقريب وجهات النظر … توضيح الغامض لأطراف بتكمل بعضها….تحقيق تماسك الكتلة لمنع الفوضى….

وعشان كده من البداية ولحد قبل إطلاق الحوار يوم الاربع ٣ مايو ٢٠٢٣ دعمت الحوار ،لكن بعد ما شفت الكلمات والحضور أعلنها لنفسي ولا أمثل إلا ذاتي….

أولا…الحوار لا يصح أنه يضم ناس خانت وقبضت فلوس لخراب البلد …واتذاعت تسجيلاتها على الكون …دول بيمثلوا طرف اللي باع واللي باع مرة وقبض يبيع مرات ويقبض….

ثانيا…الحوار أحد أركانه اكتمال الشخصية القانونية للمتحاور…. يعني مالوش جنحة ولا جناية … هو ما كانش سجين رأي هو كان سجين تعدي على وطن وبشر وترجعوا للتاريخ القريب تلاقوا التفاصيل…

ثالثا…الحوار لازم يكون بين ناس مشهود لها بالأخلاق والحد الأدنى على الأقل من الاحترام والتقدير…لكن لما تلاقي البلطجي وطويل اللسان وهاتك سيرة الأعراض ومتحدي الدولة والقانون ….يبقى إيه الرسالة اللي بنوصلها للناس؟

رابعا..التدوير نظرية تنفع لإنتاج الجماد لكن ما تنفعش في البشر …. المايل والمعووج حيفضل معووج…الخائن عمره ما يبقى وطني….

خامسا…الشباب في مصر مش تليمة وماهر واسراء ….الشباب في مصر مغربي وعبده و علي ومحمود الليثي ونور الشربيني وخريجي برنامج التدريب الرئاسي وآية عبد الرحمن والشباب اللي عمل سويفل والناس الشقيانة لصناعة مستقبل وسط ظروف قاهرة….مين قال دول بيمثلوا ولادي….

سادسا.. حأقولها وأكررها، ما عندناش أحزاب عندنا هياكل ومسميات، الحزب يعني فكرة لها قاعدة شعبية على الأرض قادرة على تغيير الأحداث، أحزاب كارتونية على قديمه.

وأخيرا…استاذ ضياء رشوان قال في كلمته للمصريين اصبروا علينا ؟!!!!!!!! يا سيدنا الناس مش معنية بيكم ولا فاكراكم …الناس همها لقمة العيش وتحسين ظروف بلادها وظروفها …من أنتم؟

كلمة أخيرة. الناس في بلادي محتاجة تشوف أهل ثقة وعلم وكفاءة بجد ، تسمع توضيح حقيقي، تعرف دورها إيه في اللي بيحصل ، تشوف تطبيق القانون على الكبير والصغير، تحس بمكافحة فساد اتوحش واستوحش وقاطع الطريق بينهم وبين المواطنة.

بقلم/ نشوى الحوفي

صحفية