هتشوفه وحده!
Read Time:53 Second
هتشوفه ماشي لوحده بيعيَّط ..
وتقوله مالك يمشي مايردش ..
هتشوفه رابط راسه ومخيَّط ..
مع إنه طيب شكلُه مايخُضش ..
هتشوفه يعيا كل ما بيشفَى ..
مرعوب يموت لو بات فـ مستشفى ..
هتشوفه طول الوقت بيصارع ..
بين العطش والشفة والرشفة ..
موجود فـ أي نهاية وبداية ..
ينفع يكون شخصية فـ رواية ..
على طول يحن لناسه ولأهْلُه ..
أعمى فـ حبه لغيرُه من جهلُه ..
وحياته خدعة وقصة وهميّة ..
هتشوفه أصدق حد ف النيّة ..
الناس بتيجي عليه وتتجاهلُه..
هتشوفه جَد فـ كل أوقاته ..
ومفيش صديق ع الأرض يستاهْلُه ..
ولا حد يحلف مرة بحياته ..
هتشوفه ماشي السكة على مهلُه ..
ودموعه نجدة لكل أحبابُه ..
تسأل عليه أحزانُه فـ غيابُه ..
وتروحله جري تقفلُه على بابُه ..
وتقوله عطفًا والحنين فـ عينيك ..
بالله عليك… افتح ماتقلقنيش
في لسّه ناس فـ الدنيا بيحبوك ..
هتشوفه خايف رافض إنه يعيش ..
وفـ لحظة تلقى جيرانه بيفاجئوك ..
إنه النهارده اتوفى من خوفه ..
وإنك خلاص ..
مابقيتش هتشوفه ..
شعر / أمجد شعلان
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating