اليوت مجنون!!
Read Time:1 Minute, 8 Second
بيني وبينك تشقى الحروف
وتسعد عند إكتمال الجمل
فيصبح كل بعيد قريب…
ويبعث من كل يأس أمل
******
تقرب مني شفايف الحزن
وتمد الوحده ايدين قاسيين
تنفك زراير الوجع الدايس فوق احزاني
عشان ميزدش ولا يطلع صوت الآااه من تحت الروح الجبس
بنمثل ليه إننا عايشين ؟
ونحط في قلب الحلم غيوم
نايمين أزاي؟ والأصل النوم
بيخاصم كل عيون خايفين
والشوق مصلوب
على ناصية شارع اخر العمر
احضان كدابة بتنضح موت
وشفايف عايز تبل الريق
ما بين النور والنار الكون بيضيق
الوحشة بتنسف كل جدور الضي وتعقرب أي طريق
إحساس كداب مليان الوان
إليوت مجنون
صادق في نبوءة الارض العاقر
اياك تتشاطر
على ديب مكار
عارف تفانين المكر مذاكر كل غباوة الكون
ايش جاب الفجر وهو شباب بيوضي الشمس
لمكان مهجور
محروم من حضن النور
متبعتر فيه أوجاع ورماد
و حنين مكسور طالع بالدم
انا بكتب ليه ؟
مش فاهم
حتى شيطان الشعر بقاله زمان
عايز على حظي النحس يتوب
وانا لسه محاصر بين نظرية دارون عن أصل الكون
وكلام الناس…
انا شايف أصلا إنه ملهش أساس
عرقك دساس
اتخير قبل ما ترمي
مشاعرك بطن الارض البور
دي الدنيا ساعات داير ما يدور
بين علم أرسطو وعك الحاجة بدور
التور بيجر الساقيه ما بيفهم سر
وبهية حبيبها بيعزف لحن نشاز
يا ما نفسي اولع كل غباوة العهر….بجاز
واقول إنجاز ..
افتح لعيوني عينيها تشوف
ترميني سهام الفكر بإن الأصل عدم …
يجادلني الخوف
ويقول مكتوب
إياك تهتم…
شعر/د.هاني العباسي
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating