حظ الأهلي ونحس الزمالك !!

مايو 9, 2023

Read Time:2 Minute, 0 Second

فيه ناس كتير قوي خاصة الزملكاوية بيتكلموا في الفترة الأخيرة عن الحظ اللي بيلازم النادي الأهلي في كل المواقف وكل الألعاب وكل الماتشات تقريبا ، وبصراحة فعلا الموضوع زاد قوي في الفترة الأخيرة وبقى ملحوظ للكل

وفي نفس الوقت ناس برضه بتتكلم عن سوء الحظ او النحس اللي بيلازم الزمالك برضه في مواقف كتيرة قوي بتبعده عن انجازات او بطولات او انتصارات بتكون قريبة منه جدا وبتروح لأسباب بسيطة

الموضوع ده شغال من زمان قوي سواء في انتصارات كتيرة للأهلي في الثواني الأخيرة بعد الدقيقة 90 ومنها انتصارات جابتله بطولات وانجازات زي جول ابو تريكه الشهير في الصفاقسي أو جول متعب في سيوي سبور الايفواري في نهائي الكونفيدرالية وجول قفشة القاضيه ممكن في نهائي القرن اللي جيه بعد تسديدة زيزو اللي في العارضه وأهداف تانية كتيرة قوي

والعكس طبعا للزمالك المنحوس اللي الناس كلها تفتكر الغاء بطولة كاس العالم للاندية اللي كان الزمالك أول نادي مصري هيشارك فيها واتلغت ومن ساعتها الزمالك مراحش البطولة دي

الفترة الأخيرة برضه الأمور زادت زي مشاركة الاهلي في كاس العالم للاندية الاخيرة بعد قرار تنظيم البطولة في المغرب ومشاركة الاهلي رغم انه كان الوصيف ، وكمان اختياره للمشاركة في البطولة سنة 2025 بسبب تتويجه ببطولة 2021 ، وتأهله لكأس العالم للاندية لكرة اليد بعد تتويجه بالسوبر الافريقي رغم انه مكانش هيشارك اساسا في السوبر وشارك بعد ما زادت عدد الفرق لـ4 ونظم البطولة والترجي انسحب قدامه في قبل النهائي ، وكمان فوز الأهلي على بيراميدز مرتين وتتويجه ببطولتين كاس مصر وكاس السوبر في مباراتين كان بيراميدز الأفضل فيهم والأقرب للفوز ، وكمان كل فريق ييجي الأهلي يلاعبه في أفريقيا تحصل فيه مشاكل وعدد كبير من لاعيبته بتتصاب قبل الماتش

أنا شايف ان مفيش حاجه اسمها حظ ونحس ، لكن هي توفيق وعدم توفيق من ربنا سبحانه وتعالى ، والتوفيق دايما بيروح للي يستحقه وللمجتهد وللي بيشتغل بجهد وتركيز واخلاص واتقان مش في الكورة بس لاء في أي شغل ، وانا هنا مش بتكلم على الدين والتدين عشان مندخلش في سكه جدال ، ولكن بتكلم عن الاتقان والاخلاص والاجتهاد في العمل ، ان الانسان يركز ويعمل اللي عليه وبعد كده ربنا هيوفقه

شفنا التوفيق ده بيحالف ناس كتير لاعبين ومدربين عشان كانوا بيخلصوا في شغلهم زي محمد أبو تريكه مثلا ومحمد صلاح وحسن شحاته وموسيماني ، وشفناه بيتخلى عن ناس تانية مش بتخلص ولا بتجتهد في الملعب والناس كلها عارفاهم بدون ذكر أسماء

قال رسول الله عليه الصلاة والسلام (ان الله يحب اذا عمل أحدكم عملا أن يتقنه) ، وربنا سبحانه وتعالى قال (ومن يتق الله يجعل له مخرجا ويرزقه من حيث لا يحتسب)

بقلم/ خالد طلعت

ناقد رياضي