الكابتن محمد رمضان “لكلم ربنا”: كنا 11فرد عايشين في شقة 44 متر

مارس 12, 2025

Read Time:1 Minute, 42 Second

كتبت _ بسملة علي

قال الكابتن محمد رمضان المدير الرياضي للنادي الأهلي السابق، الشدائد علّمتني حاجه مهمة وهي إن الدنيا إذا ضاقت لازم أنفق وأتصدق، وخاصة علي أمي وأبويا، لأنه بعد كل إنفاق يأتي الفرج!

وأضاف الكابتن رمضان لـ برنامج (كلم ربنا .. مع الكاتب الصحفي أحمد الخطيب) على الراديو (9090) :”أنا تربيت في أسرة فقيرة، في إمبابة ، والدى كان موظف واتفصل، حاصل علي مؤهل دبلوم صنايع .. كنا 9 اخوات وأبويا وأمي يعني 11 فرد عايشين في شقة 44 متر .. أوضة وصالة!

وتابع نجم الأهلي السابق: “حياتي كانت معدومة، بدأت لعب الكوره بالمراهنات، وكنت كل يوم حد استنى العيال اللى شغالين فى الورش وألاعبهم وأكسبهم، كنت بكسب كويس من فلوس المراهنات ، واخواتى مكملوش تعليم، اللي فى ورشة أحذية واللي صنايعي واحنا 3 صبيان بس والباقي بنات.

وكل ما أمر بظروف صعبة أفتكر الشقة الـ 44 متر اللي كنا عايشين فيها، فارضى بالوضع اللى أنا فيه، (يعنى كنت فين وبقيت فين)،

واردف محمد رمضان: “لعبت كوره بالصدفه، ورحت الترسانة والأهلي بالصدفة رغم إني فشلت في البداية كتير أروح الأهلي، لكن أول ماتش لعبته في حياتي أحرزت 6 أهداف مرة واحده فكانت فتحة خير عليا وعلي أسرتي،

واستطردبقوله: “عندي مواقف صعبة كتير لكن مرة قعدت 18 شهر بدون شغل، ومعنديش دخل، فوصلت عند الشهر الـ17، مراتى كان معاها دبلة دهب بس، ومعايا طفلين أولادي ، والأمور صعبة، فبدأت أكلم ربنا: (فك كربي)، ففكها عليا بحاجات محلمش بيها.

واوضح: :رغم قسوة الفترة دى أنا عمرى ما تخلّيت عن مساعدة أهلى، واستلفت فلوس كتير عشان أمى وأبويا، وانا رايح أديهم الفلوس حسيت إن فى خبر كويس جاى، وفعلا جالي شغل مدير الكرة فى النادى المصري، وطلبت مرتب كبير ووافقوا عليه

وواصل المدير الرياضي: ” مرة واحد سألنى قالى مين (الخِلُّ الوَفِيُّ فى حياتك)؟ فى البداية فكرت فى 3 أصدقائي، لكن فى لحظة لقيته بيظن إنى مش عارف معنى الكلمة، لقتنى بقول: «ربنا»، فاستغرب، فقلتله: «هو أنا هلاقي أكرم وأحن وأقرب من ربنا فين، محدش هيبقي سندي غيره؟».

واختم بقوله: :الشدائد علّمتني حاجه مهمة وهي إن الدنيا إذا ضاقت لازم أنفق وأتصدق، وخاصة علي أمي وأبويا، لأنه بعد كل إنفاق يأتي الفرج”.