احمد سالم يكتب : مكاسب الزمالك من الإنسحاب!!

يونيو 30, 2024

Read Time:5 Minute, 33 Second

بما اني من هواة السياسة و بشوف انها بتدخل في كل تفاصيل حياتنا حتي لو بشكل غير مباشر ،حضرتك بتحل مشاكلك العائلية غالبا بالسياسة و حتي لما بتحاول تقنع حد بحاجة بتقول انا بسايسه.
في السياسة في علم و فن اسمه فن التفاوض و ده اتألف فيه كتب و مراجع ملهاش آخر و من اشهرها التفاوض الفعال لباربرا اندرسون او فن التفاوض لمايكل ويلر و غيرهم ، و من اشهر ما يقال في التفاوض هو ان تطلب دائما اكثر مما تتوقع الحصول عليه و تظهر الدهشة و عدم الرضا عند سماعك العرض الأول من غريمك و اللي لازم ترفضه حتي لو كان مرضي بالنسبة لك او انك تطالب بالمستحيل عشان تحصل علي الصعب و الا ترضي ابدا بالممكن ،او انك تقسم المشاكل الكبيرة المستحيلة لمشاكل صغيرة وبعد كدة تتفاوض عليها عشان تاخد اكبر قدر ممكن من المكاسب ،
يمكن يكون الكلام ده صعب لكن هاربطه لحضرتك بالازمة الأخيرة، لما تعرض الزمالك للظلم التحكيمي الفج قدام المصري كان قدام إدارة الزمالك ٣ اتجاهات او مسارات ،إرسال خطاب الي الرابطة و لجنة التحكيم للشكوي من احداث المباراة و ده كان آخره الجملة المستفزة بتاعة ان أخطاء التحكيم جزء من متعة كرة القدم، او اتخاذ قرار بعدم لعب المباراة التالية اعتراضا علي التحكيم و ده برضو كان آخره تحويل الحكام للتحقيق و ياخدوا اجازة يصيفوا اسبوعين و يرجعوا تاني ده لو مكانش الأخ بيريرا دعمهم و خلاهم يحكموا الماتش اللي بعده زي ما عمل ،و الطريق التالت هو اللي قرر مجلس إدارة نادي الزمالك انه يمشي فيه وهو اتخاذ موقف عنيف و حاد لالقاء حجر في المياه الراكدة او بلغة اهل السياسة لتحريك القضية ،و هنا كان لازم يكون فيه مطالب سقفها عالي علي أمل إصلاح المنظومة اللي ٩٩% مننا متفق علي تدهور حالها ، عشان كدة أكدنا ٥٠ مرة اننا مش عايزين نختزل الأزمة في انذار نداي او بنالتي زيزو او ماتش الاهلي ، قدمنا ٤ مطالب و هفكركم بيهم
1- التحقيق العاجل فيما حدث في مباراة المصري، وإيقاف كل من حكم الساحة وحكم تقنية الفيديو ومنعهما من إدارة أي مباريات مقبلة للنادي.

2-عدم خوض أي مباراة من مباريات الدور الثاني قبل أن تستكمل الفرق المتنافسة جميع مباريات الدور الأول، وفقاً للترتيب المنطقي بعيدا عن التدخلات الشخصية.

3- انتداب لجنة محايدة من خارج مجلس إدارة اتحاد كرة القدم ورابطة الأندية؛ لإعادة تنظيم وترتيب مباريات الدوري، بما يضمن الحياد الكامل.

4- تسليم جدول كامل لجميع المباريات المتبقية حتي نهاية الدوري، بشرط أن يتحقق فيه جميع مطالبنا السابقة
و هنا بدأت المفاوضات و اجتمع د.اشرف صبحي و النائب احمد دياب مع الكابتن حسين لبيب اكتر من مرة و استمعوا للمطالب ال٤ و غيرها بمنتهي الاهتمام و تحقق منها ٣ مطالب بالكامل و بالزيادة _ بعد مباراة الاهلي و ليس قبلها_ و هم
اولا …إحالة الحكام للتحقيق و اقالة بيريرا اللي تحدي الزمالك و استفز جمهوره بإعادة تعيين الحكام لمباريات أخري، و بما ان عقده ينتهي شهر ٨ و له شرط جزائي و في ظل أزمة الدولار تم الاتفاق علي رحيله فور انتهاء عقده و تعيين كفاءات مصرية محايدة .
ثالثا…كنا عارفين ان فكرة اللجنة المحايدة صعبة التنفيذ ولكننا تعمدنا توجيه رسالة غير مباشرة شديدة اللهجة عشان نقول للمسؤولين لجنة المسابقات، احنا مش واثقين فيكم و حيادكم محل شك كبير ،و كانت النتيجة هي الاتفاق علي سياسة مختلفة تماما في وضع الجدول لا تخضع للاهواء الشخصية و يقوم بها الأندية نفسها من غير املاءات و تدخلات من اي طرف لأول مرة في تاريخ الدوري المصري و ده هنشوفه الموسم الجديد و الايام بيننا
رابعا …تم بالفعل تسليم جدول المباريات المتبقية حتي نهاية الدوري بعد ما كانت مباريات مابعد ١١ يوليو اشبه بالاسرار الكونية ولا يعلم عنها شيئا الا ربنا والحاج عامر اللي هو لما نشوف الأولمبياد نبقي نرتب الماتشات حسب المصلحة .
المطلب الوحيد اللي لم يتم الاستجابة له هو أداء مباريات الدور الأول وفقا للترتيب الأصلي و ده بعد ما عرضت علينا الرابطة السيناريوهات البديلة للترتيب و اللي لو كنا اتمسكنا بها كان الدوري ممكن يمتد الي مالا نهاية وكنا هنعمل زي كأس مصر و نلعب دوريين في وقت واحد ، و بالنظر للمصلحة العامة تفهمنا الموقف مع وجود ضمانات بأن التهريج التنظيمي ده مش هيتكرر تاني بعد تسليم الجدول للأندية اللي هي اصلا هتكون شاركت في إعداده بالكامل ، و بالتالي هنعتبر المطلب ده اتأجل للموسم القادم لضيق الوقت و مفيش بعد كدة مباريات دور تاني هتتلعب قبل الدور الأول،
هنا السؤال فين التنازل الخطير اللي كتير بيتكلموا عنه اذا كنا تمكننا من تحقيق ٣ مطالب و تم تأجيل الرابع مع الموافقة عليه من حيث المبدأ؟؟
تعالوا نتخيل السيناريو البديل لو كنا صممنا علي موقفنا و ملعبناش ماتش النهاردة ،ايه كان ممكن يحصل احسن من كدة ؟؟ هل أداء مباريات الدور الأول قبل الدور التاني كان بالخطورة اللي يخلينا ننسحب من الدوري و ندخل في جدل قانوني حول هبوط الفريق للدرجة الرابعة من عدمه و طبعا كنا هنحارب لكن هل المطلب الرابع ده كان يستحق الحرب عشانه؟؟
هل ده اللي كان هايرجع للمنظومة الكروية هيبتها و نظامها ولا الوقفة اللي حصلت وصلت الصورة و خلت الأندية تتوحد و تطالب بحقوقها في اكتر من موقف أثناء الأزمة، هو اللي بيعمل مظاهرة او اعتصام او احتجاج في شركة او مؤسسة بيكون هدفه او يحرقها و يدمرها ولا اول ما رسالته بتوصل و مطالبه معظمه بتتحقق بيكمل شغله عادي؟؟
من اول يوم و احنا بنؤكد اننا مش دعاة فوضي ولا عايزين نتحدي حد لأنها مش خناقة في الشارع ،احنا سجلنا موقف و اخدنا معظم اللي عايزينه سواء حاليا او بالكتير في بداية الموسم الجديد ،
و لو علي الجماهير المنافسة و الهزار اللي بيسموه التحفيل احنا كلنا بنضحك مع بعض وانا شخصيا فاكر لما الاهلي انسحب قدامنا في ماتش السوبر و لاعبنا المحلة ايام الجيل الجبار بتاعنا كنا بنستفز أصحابنا الأهلاوية و نقول لهم انتم خايفين تلاعبونا في الوقت اللي كان عندهم وقتها مطالب حقيقية بس الفرق انه مكانش فيه سوشال ميديا ،
و بعدين هنخاف من الاهلي ليه اذا كنا لسة كسبانين ماتش الدور الأول من شهرين و عندنا ماتش السوبر معاهم كمان شهرين ،يعني هنعتذر عن ماتش تحصيل حاصل و نروح نلاعبهم في السوبر ؟؟ طب ما كنا خلينا الاعتذار للسوبر احسن ،
و اللي يقولك طب ليه ما لعبتوا ماتش فاركو بعد المصري ،عشان ده كان ماتش دور اول و حظنا الحلو ان اللي بعده كان الاهلي مش عشان خايفين زي ما بعض السذج متخيلين،لا عشان لو كان الاعتذار ده قدام اي فريق تاني مكانش الموضوع هياخد الحجم ده ولا الاهتمام ده ،
السادة جمهور الزمالك العظيم كل الشكر علي دعمكم و كل الاحترام و التقدير لارائكم اللي أكيد بتعبر عن حبكم اللانهائي للكيان ،و خلينا نتفق ان الاعتذار عن المباريات كان وسيلة ضغط و ليس هدف في حد ذاته،
و تأكدوا ان مجلس إدارة نادي الزمالك اتخذ القرارات الأكثر تحقيقا لمصلحة الفريق دون الدخول في التفاصيل و اصبروا كام شهر هتعرفوا ان اللي حصل ده كان مهم جدا انه يحصل وخلينا نفكر حاليا في الأهم زي أزمة القيد و الكونفدرالية و تدعيم فرق الصالات .

بقلم/ احمد سالم

المتحدث الرسمي لنادي الزمالك

صفحته الرسمية