فوازير للشاعر أحمد فؤاد نجم “قصائد ساخرة”
Read Time:1 Minute, 36 Second
شاعر بيتخن من بوزه
ممكن تخوف بيه عيالك
نازل يقزقز أزا أوزو
حتتك يمينك وشمالك
بقي مليونير، واللي يعوزه
يلقاه في إيده، عقبالك
وخلي بالك من زوزو
وخلي زوزو من بالك
***
يا ولية، عيب اختشي
يا شبه إيد الهون
ده انتي اللي زيك مشي
يا مرضعة قلاوون
مدحتي عشرين ملك
وميت وزير ورئيس
مروان، وعبد الملك
والمفتري، وعتريس
بتغني بالزمبلك؟
ولا انتي صوت إبليس
من أول المبتدأ
حتى نهاية الكون؟
***
مقاول وشاعر وبياع ملوحة
وتاجر غناوي وسمسار بنات
نعيمة وزكية وعطيات وتوحة
ومخبر مودك على التقريرات
حضر من بلدهم، بمقطف ملوحة
جبر واشتراله تلات تاكسيهات
***
لماليمو الشخلوعة الدلوعة.. الكتكوت
الليلة هـ يتنهد ويغني ويموت
يشيلوه قال على لندن
علشان جده هناك
من بعد ما يتلايم
على دخل الشباك
ويهرب أموالك
ويقولك أهواك
يا شعب يا متلوع
ع الهدمة وع القوت
***
لأن الصراحة ف بلدنا قليلة
بفضل المباحث، وأدب الرموز
جعلها اللئيم ابن بنت اللئيمة
شعار يرمي تحته السموم كيف يعوز
وبهدل أصول الصراحة العظيمة
وخلا الندوب في الحقايق بروز
وحرم وحلل
وكتر وقلل
وسمى القبيلة الذليلة حليمة
وقال ع السكوت ع الهزيمة:
يجوز؟
***
سكرتير عموم مصر
وافهم كلامي
تعدد مناصبه
ولا تنتهيش
وجيه بالوراثة
وجاهل عصامي
جمع جهل طايل
وإيه؟ من مفيش
وكان أصله ظابط
وحول حرامي
ويكتب أدب
بس ما يتقريش
***
ينسونة المتبعتر
ما لقاش أب يلمه
إبن امه، بس امه
كانت اجدع من أمه
باع نفسه بخسارة
ما قابلش المعايرجي
كان مالك أفكاره
واتعين تفكيرجي
والحاجة اللي تحير
طب إيه اللي اتغير
كان كاتب سرايرجي
واتحول شماشرجي
***
يكون في عون الصحافة
الله يكون في العون
لَمّالك يا دود القرافة
يا رمة يا ملعون
ينهش لحوم الفرايس
في الضلمة يا وطواط
والكلمة عندك بضاعة
أما الشرف مطاط
بريئة منك بلدنا
مسلمين واقباط
ولا انت موسى ولا انت
من كلاب فرعون
***
اللورد بن اللورد بن اللورد
متأصل في الثروة
لا أوناسيس ولا فورد
حيطبق بسلامته
قوانين الاشتراكية
ويدافع من عشمه
عن صوت الحرية
وأهي كوسة على بامية
على قرع استامبوللي
بتفرع يا بلدنا
على وش التسقية
شعر/ احمد فؤاد نجم
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating