ناقد يطالب بمصالحة الخطيب ومرتضى منصور وتهديد الاتحاد الافريقي

يونيو 6, 2023

Read Time:1 Minute, 49 Second

كتب _ باسل فهمي

طالب الناقد الرياضي خالد طلعت رئيسا ناديي الاهلي والزمالك بتقليل حدة الخلافات وتصفية الأجواء بينهما من أجل التصدي لانحيازات الاتحاد الافريقي لكرة القدم لأندية بعينها خاصة أندية المغرب الشقيق ، وطالب بتهديد الكاف بالانسحاب من البطولات الأفريقية لمنع الظلم عن الأندية المصرية.

وقال “طلعت” :”كلنا شفنا ان الكاف في الفترة الأخيرة بدأ ينحاز لمنتخبات وأندية المغرب في البطولات الأفريقية بشكل فج، سواء في القرارات التنفيذية (زي ان الاهلي يلاعب الوداد السنه اللي فاتت النهائي ماتش واحد في المغرب ، وبيراميدز لعب مع نهضة بركان نهائي الكونفيدرالية ماتش واحد في المغرب برضه) ، أو في القرارات التحكيمية اللي بتكون معظمها لصالح الفرق المغربية وفيها مجاملة ليهم وظلم للفرق المصرية وده ظهر في ماتش الأهلي والوداد الاخير ، وماتش الوداد وصن داونز كمان قبله ، وماتشات تانية كتير

واضاف الناقد الرياضي: “انا شايف ان كابتن محمود الخطيب والمستشار مرتضى منصور لازم يقللوا المشاكل اللي بين الطرفين ويهدوا ويحطوا ايديهم في ايد بعض لصالح الفرق المصرية والكرة المصرية ، لأن طول ما هما فيه بينهم وبين بعض مشاحنات وخناقات ومشاكل وقضايا ده مش في صالح الناديين لأن دايما الاتحاد قوة

واردف طلعت عبر منشور له على صفحته الشخصية بموقع التواصل الاجتماعي فيس بوك:

: “أنا شايف ان لازم تكون فيه وقفة موحدة من كل الأندية المصرية الكبيرة اللي بتشارك في بطولات أفريقيا (الأهلي والزمالك وفيوتشر وبيراميدز) ومعاهم كمان اتحاد الكرة المصري ، ويحصل اتفاق بين الخمس اطراف دول ويتبعت خطاب رسمي للاتحاد الافريقي من اتحاد المصري بمشاركة الـ4 اندية ويتقال فيه ان فيه شعور بالظلم ومجاملة الفرق المغربية في الفترة الاخيرة ، ويتحط فيه كل المواقف والاحداث والحالات التحكيمية في أخر كام سنة بالتفاصيل

واستطرد في قوله : “ويتحط تهديد رسمي انه في حالة حدوث اي اخطاء تحكيمية في ماتش العودة بين الاهلي والوداد هيصدر قرار رسمي بعدم مشاركة كل الفرق المصرية في البطولات الافريقية لمدة سنتين او تلاته ، ونكتفي بالمشاركة في البطولة العربية ، وكمان ممكن احنا نستحدث بطولة في مصر ونجيب فرق كبيرة عربية وافريقية ويبقى فيه شركة راعية ونحطلها مكافأت كبيرة ونقل تلفزيوني تدخل دخل مادي كبير لينا وننافس بيها بطولات افريقيا

واختتم طلعت بقوله: “أعتقد تهديد زي ده هيخوف ويقلق الاتحاد الأفريقي والشركات الراعية وبي ان سبورت الناقلة للمباريات ، لأن عدم مشاركة الفرق المصرية هيسبب خساير مادية رهيبة جدا للكاف ولكل الشركات الراعية، وهيوصل رسالة قوية للفيفا ان فيه فساد في الكاف”.