كإنُّه حِلم
نَفس الأسَامي والأمَاكِن والوُشُوش
مَشهَد حَزين مِتعاد في فيلم
و كُل مَرَّة بتِتوِلِد أحداث جديدة ف شكلها
لكنَّها ..
نَفس البداية والحكاية والمَصير
تُرُوس ودايرة بفِعل (سِير)
بس المُحَرِّك صوت ضمير
بينادي قلبي ويسألُه
بصوت مُغَلَّف بالسُكُوت
ليه النهاية تَمَلِّي مُوت؟؟
ليه ف كُل مَشهَد الأوان دايما يفوت؟
وابدأها تاني مِن جديد
ف ارجع أعيد نَفس الطريق..
زي الغَريق..
مستني قارِب م السَما
ياخدُه يِطِير…
أو إن مارِد م الفانوس يخرُج يقوله (تطلب إيه)؟
ف اطلب أغَيِّر الحِكاية كُلها
يجيني هاتف في المَنام
يقولِّي قُوم فَتَّح عِينيك
الحَل مَوجود بين إيديك
ارسم نهايتَك ثم عِيش من أجلها
…(أَبصِر تَرىٰ) …
يا هل تَرىٰ في إِيدَيَّا فِعلا حَلَّها؟
شعر/ مصطفى الشحات
Leave a Reply