كل واحد مننا عايش حياة!!
Read Time:46 Second
كل واحد مننا عايش حياة
انما كل اللي عايشين الحياة متوحدين
كل شهر مع القمر بنبص فوق ونرمي طوق يشق ضوء يبان هلال ويبقى بدر ومد جزر على البحار والعاشقين
كل ساعة الطير بيطلع من خشب ساعة الصالون ويقول كواك أنا من هناك حارجع معاك الى زمان ضاع من سنين
كل ثانية وكل قلب يدق دقة وربع دقة في ايقاع ثابت رصين
كل شقة وفيها اودة وفيها نور وبرتقان وناس بناس متونسين
كل صبح السندوتشات اللي راحت للمدارس والعمل مستعجلين
كل يوم خميس بنسهر عند واحد من صحابنا نقول قصايد في الجيوب متكرمشين
كل جمعة بنقرا سورة الكهف مع سورة ياسين
كل دعوة نقول آمين
كل قداديس الكنيسة مصليين
كل قواديس السواقي سقايين
كل كراريس التلامذة مجلدين
كل ليلة واحنا قدام الشاشات متلخبطين
كل مصر تغني لفلسطين حنين
كل حبة نروح هناك ونلاقي روحنا مروحين
كل عام واحنا بخير وطيبين
كل عام واحنا بخيط متربطين
كل عام واحنا هدايا للسما ومنورين
شعر /امين حداد
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating