هذا العام مش نافع حــج !
Read Time:4 Minute, 14 Second
تحت الليل،
مش لابس سُتره
ماشى فى قلب النار
سقعان
ولا فيه حد جدع
، أو عتره
مش شايف ريحة الجدعان
عايز مره فى عمرى، لو اغلط
ماشى مبهدل..
توبى مرهرط
شارب بنج فى عقلى جِنان
جنب الحيطة
باعيش، وباعيط
باتنفس حزن، ودخان
مش دريان..
باعمل مستعبط
مستعبط، ومانيش دريان
الوطاويط عمّاله
توطوط
وبتنبح فوقى الغربان
كل فطورى الصابح..
شايط
نازل حزنى كأنه سبايط
ولا حسيت أبدا بأمان
باتبعتر على طول
واتبعزق
أنا واحد…. إنما باتجزأ
وبادوب فى رمادى الألوان
شارب بنج، فى عقلى جنان
مصارينى فى بطنى.. بتتلوي
بانده نور الشمس بقوه
وباموت من غير استئذان
مصلوب فوق جدران الكوفه
شايل بيرق
ماسك لوفه
وسحورى فى رمضان حمضان
باتكلم، من قلب المهجـــه
العيد مالهوش أيها بهجه
والشاعر فتح الدكان
الشاعر عامل إعلان
الشاعر ، مش م الإخــــوان
كل دقيقة، الغيم بيدلّس…
باقعد ع السطح.. وباتشمس
باستنى الفجر القلقان
باستنى، الضى من الآن
شايل شمس فى عبّى – وباهمس
شايف: ناس فى الطين موحوله
وغيلان ماشيه بعينها -الحولا
ورجال من غير
أى فحوله…
الديب بيسوق.. الحملان
،،،،،،،،،،،،،
وأنا مصلوب – من غير صلبان
فاتح عينى لا كين مش فايق
المشهد قدامى حرايق
ولا شايف أشجار وحدايق
اللون غايب م الألوان
نفسى أحس فى يوم، بأمان
كل الأبواب فجأة اتقفَلتْ
أما الشمس قصادى، فأفلت
عايز أهرب م النار، وافلت
والعالم بيقول: ما خلاص
اتوقف رقاص الساعه
فى الساعه اتوقف رقاص..
،،،،،،،،،،
كل دقيقة الغول.. بيغوّل
ولا عدتّش باحلم، كالأول
متكتفه ايدى يا إخلاص
واليمامات جوه الأقفاص
باصحى وكل عيونى عماص
اتوقف بندول الساعة..
وأنا أصبحت كأنى إشاعه
أنا أصبحت.. كما الفزاعه
بامشى كأنى خيال فى خيال
أنا ميّت مقتول – فى شوال
من غير بنج لوحدى، باخطرف
عندى وطن مجروح وعيال
باغرق تحت الموج، واتشال
وارقص وأنا مدبوح التانجو
وباشيل نعش تقيل على كتفي
دايخ من غير بودره ،،وبانجو…
وباروح، وأنا عارف على حتفي
وباخطرف – فى الحلم.. باخطرف
نفسى من المذبحه- لو أنجو
أنا مش قادر أحرّك كتفي
أصل تقيل – على كتفى النعش
رايح وأنا مبسوط، على حتفي
وفى إيدى المغلولة كلبش
باخسر دايما، ولا باكسبش
حدفونى.. بصواريخ على دبش
وكلاب الدنيا المسعوره
فاتحه نيابها، ما بتهبهبش
،،،،،
امشى عدل ولا تتلخبطش
تحت الأرض حبوب، وبذور
فوق الغصن طيور صداحه
وباموت، لكن قالوا: كويس
تحت القبة تيوس نطاحه
باصرخ ضاعت مصر يا ريس
إنما ناس كاشفين العـــوره
وهاينجح ، ميت شاهد ،زور
دلقوا فى بدنى.. رصاص مصهور
حطونى فى باترينه الفرجه
داخله ببطء – فى روحى سرنجه
أنا مش قادر أطير، وأرفرف
واقف فى المحظور وباغني
وباغنى فى قلب ، المحظور
ضربونى فى العتمة لأنى
يا سعادة البيه، المأمور
عينى بتشحت حبة نور
الورده على الطرقه بتنهج..
وأنا ماشي – مش حسب المنهج
دبحونى بسكين وساطور
وال بقى شاهد زور
كان مأجور أصبح متأجر
كل غيطان حداد بتخضر.
كل غيطان الباطل ، بور
الشاعر أصبح، شعرور
صوت الباطل طعمه. معطن
صوت الحق،
كأنه زهور
تملا غيطان النور والنرجس
قمح الظّلم تمللى مسوس
الترباس.. على صوتى، متربس
علقم نطفح ياكلوا ملبّس
باصرخ: ضاعت مصر.. يا ريس
دمي صبح ، في ميدان ، مهدور
نفسى من الكوابيس أتحرر
نفسى فى مصر ترد الروح..
عندى كلام مش قادر اعبر
عندى كلام مش قادر ابوح
باب الضلمة -عليا مسَنكر
باب الضي- ماهوش مفتوح
وأنا عايش ياوطن ، مجــــــروح
عايز أدعك جسمى واهرش
واشرب ع الريق باكو معسل
غسّل يا مغسل فى الجثة
عايز أعيش، ولكنى باكسّل
نفسى يا عم، فى واحد شاي
العقرب لابد، فى حشاي
اضربنى فى عينى المضروبه
مش قايل – معلهش النوبه
ولا قايل يا وطن، باى، باي
،،،،،،
غطينى بمحرمه وكوفيه
قلم الظلم معلِّم فيا
الأوراق مش مستوفيه
أنا دايخ وكأنى فى حضره
جبتى رزقا وعمتى خضرا
والأزهار فى الفجر، عفيه
نفسى يا عم فى واحد شاي!!
بيّاع الجرجير بينادى..
والعقرب لابد، فى حشاي
وباخطرف وأنا جوه الصوبه
الصوت مش طالع جواي
عينى من الفجريه.. .. بترمش
الأحجار فوقى بتتقلقل
والإيد النهابه بتهبش
مش قادر – أبدا اتحرك..
والقمر العربى بيتأمرك
يا جهينه – كداب قوى أمرك
ماشى فى قلب النور، وباضبــّش
مش وقت باحب – وماباحبــّش ،
طوابير الأموات بتحاصرك
مصرنا عُمر، ما كانت مصرك
التذكره دايره ودواره
أخرج يا فرعون من قصَرك
الأحجار فوقى، بتتقلقل
فوقى بتتحركى.. يا حجارة
الليل بيحاول يتزحزح
وكلاب فوق الضى بتنبح
النار أكلت كل المسرح
أما الفجر مالهشى.. بشاره
الأحجار، فوقى بتتحرك
من فرحى، بادخل لمغاره
الوطن العربى، بيتأمرك
والجزار فتح الجزاره
ألف جراده، – بيعملوا غاره
والمشرط نازل بمهاره
نازل قطع، ونازل قطش
أنا مش لاعب.. هذا الماتش!!
هجم الأسطول جوى وبري
نازل طفل بحبله السري
وأنا بانشد أخدونى تحري
الصواريخ محموله بذري
كل العالم نازل بطش
امشى فى صف.. .. ما تستعبطش
باغزل صوف.. فى القمح بادرّى..
نخلى بقالُه سنين.. ما طرحش!!
ولا عصفور اشتاق إلى غصني
ولا غصنى يحن لعصفور
عينى بتشحت حبة.. نور
تحت القبة الزرقا بارفرف
أنا عيان جوه المستشفي
واخد حقنة بنج باخطرف
باكنس كل سقوف الدنيا
طول اليوم، باكنس وبانضّف
حقنة باخطرف – واخد بنج
وبانضف فى قزاز، بسفنج
باحلم أنى باسوق الطفطف
حاضن كل بنات – الزنج
ليه مالكيش حلمات – يا بزاز
…
شايل أنبوبة بوتاجاز
عقلى بيشطح – روحى توّج
بيتى من الهزه، بيتـــرّج
شارب يأس، وشارب بانجو
واخد بنج
نفسى من المذبحة
، لو أنجو
عايز أهج.. من البرواز
ريحة كبريت جايه وجاز
عايز أحج..
إليك يا حجاز
هذا العام، مش نافع حِج
هذا العام
مش نافع
حِج
شعر/ محمــد كشـــــــــيك
رحمه الله
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating