نجوم واراء

المرض ليس خبيثاً.. الخبيث هو المرض!!

alkhabarnew

أبريل 2, 2023

Read Time:1 Minute, 53 Second

اندهش طبيب المخ والأعصاب وهو يتفحص صور الأشعة على العمود الفقري.. يوجد غضروف في الجانب الشمال وتآكل في 4 فقرات

* من فضلك اقف… الحتة دي بتوجعك؟

– لا

* فيه وجع هنا؟

– لا

* الوجع فين؟

– المس منطقة في الجانب اليمين واقول هنا

يمسك صور فحوص الكليتين ويعبر عن دهشته:

لايوجد شيء يبرر الألم لا في الكلى ولا في العمود الفقري

شيء عجيب… الألم ما ينفعش يكون هنا خالص، وطالما مفيش ألم في الجنب الشمال انا مش قلقان من الغضروف طالما لا يسبب مشكلة مع الاعصاب

انا هعرضك على طبيب متخصص في امراض المناعة.. جسمك في حالة انهيار غير مبرر طبياً، والصح اننا نعرف السبب بدل ما بنستهلك ادوية كتير في اتجاهات مش واضحة

– انا كتبت مرة يا دكتور اني مريض بالغموض.. عندي امراض في كل مكان ومعنديش حاجة محددة.. وفكرت فعلا في التعبير اللي انت قلته دلوقتي عن الانهيار البدني.. كل اللي انا محتاجه اني اقدر اقعد على كرسي واستعيد درجة مقبولة من التركيز واحاول انجز اللي ربنا يقدرني عليه من مشاريع الكتابة المؤجلة

عقاب كبير يا دكتور اني اتحرم من الكتابة في الوقت اللي عاوز اقول فيه خلاصة تجربتي في المشوار..

يتعاطف الطبيب مع رغبتي في استعادة قدرتي الطبيعية على التركيز والكتابة، ويسود الصمت بيننا لفترة قبل أن اقطع حالة الصمت بتحيته وشكره على الصبر والتعب معي واقول وأنا أستعد للخروج: هنكمل ونشوف.. ربنا يكتب الشفا من عنده

في الطريق الى البيت أستعيد تعبير “مريض بالغموض”، وأفكر في أن مصر كلها في حالة تشبه حالتي.. المرض مش غامض ولا حاجة… فيه كابوس بيفرض على البلد نوع من العجز وكسر الهمة وشلل الفكر والحركة

المرض سياسي بالدرجة الأولى.. المرض مش في جسدي الضعيف المقيد.. المرض في المحيط اللي بيعيش فيه الجسد.. بنعاني من نقص اكسجين الحرية، وقصور في القلب ومشاكل في الصمامات وفساد الهوا والطعام والميا اللي بنشربها.. المرض في الوطن قبل ما يكون في البدن….

يا رب انعم علينا بالعفو والعافية والقدرة على الوقوف في وجه سلاطين الجور

عندي أمل كبير اني هرجع قريب، واكمل مواجهة، وأقول اللي لازم يتقال..

عندي عشم كبير في الرحمن انه مش هيخذلني ولا يحرمني من الموت واقفا وانا بواجه السنوبز الأوغاد تعابين القهر والفساد

اللهم إنا نعوذ بك من كل قهر يؤلمنا ومن كل هم يحزننا ومن كل شخص يحمل الخبثا والضر لنا.. اللهم لا تعجزنا عن مواجهة أعداء الحق والخير والحرية واكتب لنا نصرا مفرحا على الظالمين الفاسدين..

اللهم آمين

بقلم/ جمال الجمل