إحنا اتوجعنا كتير قوي يا أمّه
Read Time:1 Minute, 56 Second
إحنا اتوجعنا كتير قوي يا أمّه
والضرب كان على روسنا زي الدق فوق الطبل
كل اللي كان يعرفنا كان يضرب
وكإننا جوز خيل غريب في اصطبل
مع كل شمس يضيق علينا الحبل
مع كل ضلمه تضمنا العفاريت
مع كل رشة ملح مطّاهر
يهاجمنا خوفنا من اللي مش ظاهر
فترتبيلي الدنيا بضلوعك
وتكلفتيني بقلبك الطاهر
وتغمسيلي الوحده بالحواديت
وتمدي إيدك تقفلي الحوانيت
وتنيمي الكتاكيت
وتصلي فتؤمي الحيطان والبيت
وتقولي للكبريت يقف تماثيل
مع كل ليل تتمد إيد جبريل
فتولّع القناديل
وتخيط الهلاهيل
وتفرّغ الأحزان من البراميل
وتعز كل ذليل
وتقص ديل فيل أبرهه الأراجوز
صاحب محلات العنب والموز
لما اتغلب تقوليلي قوم واغلب
وتحطي إيدك فوق دماغي فافوز
يضرب عدوك ع المفارق بوز
ويشيل حبايبك سيفك المغروز
وتوضّبي الموزوز على الواشي
باعنا الشتا للصيف
باعنا الخريف للسيف
باعنا الأبالسه لنخاسين حلاليف
والفاشي باع أحلامنا للماشي
كلنا وما كلناشي
قلنا وما قلناشي
واتباعنا من عالم ما تسواشي
وانتي اللي واقفه لقلبي أومباشي
ولسكتي زنهار
بانده عليكي ف أول الشارع
فترد عنك هدمتك في الدار
وعنيكي في البنوار
ورغيفك اللي مقمرّاه ع النار
وضفايرك الأنهار
وعيونك المتعبيين أسرار
وهديل حمام سيدنا النبي في الغار
أمّه…. أمّه…
يا بنت خضره المستويه خَضَار
والطالعه فيّا نهار
والماشي باتسند عليها جدار
والمستخبي وراها جيش جرار
والمحمي فيها شعار وضليله
يا واقفه طول العمر سانداني
ليه النهارده مميّله الشيله؟
باعنا الأجير لأجير بكام كيله؟
وسرقنا روحنا إزاي من البياع
عشقك مُربع مُدْهب الأضلاع
قلبك شراع يرمح قصاده سباع
خدتي الحياه بدراع ما بيكلش
ورجول ما بتملّش من المشاوير
الحمل كان قد الجبل واكتر
لكن على دماغك ما كانش كبير
كانت دموع الزير تشوفك تنكسف وتغير
كان الحمام بينام ع كتافك
وف وقت سعيك يتحرج ويطير
كان الكتير الصعب في الإمكان
والدنيا مهما بتستحيل في اليد
كنتي ف طريقك مهما نتعب… جد
كانت خطاوي الرّجْل تخبط ع الرصيف ينهد
والعين تبص لسور عداها يخاف
أنا يا امه كنت عايزلك الإنصاف
أو جزء من صوت اعتراف خافت
الدنيا تنصف بعد ما اتعافت
والحلم يتحقق لناس خافت من التفسير
باعنا الضرير أيام زمان لضرير
بس اشترانا من المزاد النور
إحنا اتوجعنا كتير قوي يا امه
وعشان يزيدوا حصارنا علّوا السور
وسابونا وسط اللي اشتهانا طيور
ماشيين نعد الهربانين في الدور
والمحبوسين في الطمي
القناصين واقفين على دماغنا
وكإننا جوز خيل باعوه للرمي
شعر/ سعيد شحاتة
عضو مجلس إدارة اتحاد الكتاب
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating