اقلب الصفحة القديمة
Read Time:36 Second
اقلب الصفحة القديمة
و ابتدي من اولى اول
بس عدل في السيناريو
اولا ..
شنطتي تبقى خفيفة
ثانيا ..
يبقى بدل السور براح
ثالثا ..
العصاية تبقى عود يعزف موسيقى في الصباح
و المدرس يبقى ابلة لابسة بمبي
بهجة بتوزع نجوم
عالكراسات
و النشيد اليومي يبقى ..
( طيري طيري
يا فراشة ملونة
الحياة حلوة و جميلة
و انت لسه صغيرة
طيري عدي السور و غامري
بعد كل سور تملي
فيه حكاية ملهمة
طيري طيري
يا فراشة ملونة
طيري بالاخضر براح
طيري بالازرق سما
الحياة حلوة و جميلة
و انت لسه صغيرة )
..
النشيد البهجة يخلص
تبتدي الازهار تفتح
كل تاء مربوطة تفتح
الف شباك عالحياة
كلنا ننجح و نطلع تانية تاني
و من جديد نزرع اماني
و الاماني ما تنتهيش
شعر/ حنان شاهين
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating