ريشه عليها أثر من دمى

أغسطس 17, 2023

Read Time:56 Second

بنات أفكارى
بترضع
من نفس الأم
اللى بترضع منها
أحلام يقظه
ف شوارع طوخ
ماشيه على الجمر
تزُقّ الذكرى القاعده على الكرسى المتحرك
من عند “استديو حماده”
مطرح ما اتصور أول صوره
بالألوان
عيل كنت انا هو
من 25 سنه واكتر سابنى
لغاية “طوخ الثانويه بنين”
والدِّكَّه اللى كتبت عليها بخط اٍديا
تفسير أحلام, أشعار, حكايات غراميه

أحلام اليقظه
بتزق الذكرى القاعده على الكرسى المتحرك
وتدَوَّر
بين أحراش النسيان
وغابات الحزن
ع الحلقه المفقوده
النسخه الأصليه
من تفاصيل عَرْكه قديمه
مكان وزمان ما الكوابيس طلعت لى
نصبت لى الفخ,
سرقت منى جناح الروح,
وادِّتنى بداله العكاز ده
يوم ما اعْتَرْ فى الحلقه المفقوده
أكيد هالقى هناك
كام ريشه عليها أثر من دمى
وحبال صوت مقطوعه
من قلب حناجر سرب طيور
ساكن قلبى
بقى له كتير نفسه يغنى
هاجيب له حبال صوته المقطوعه
واركِّبها فْ حنجرته
واشبك ف جناحه
الريشه اللى عليها أثر من دمى
وافتح باب قلبى
فيطير ويغنى
ويدوَّر ويايا
لحد ما نلقى جناح الروح