دموع في عيون حلوة
Read Time:39 Second
هو انتي ليه بتعيّطي
كل امّا اقولّك: “لمّا اموت”..
وانا مش بموت..
غير لما تيجي تعيّطي!
متعيّطيش..
إيه ذنب ليل رمشِك يسيح قبل النهار؟!
إيه ذنب سمّاعْةِ الودان؟!
تلمس دموعِك ذَبْذَباتها فتترعش أكتر كمان!
إيه ذنب أوتار الكمان..
لمّا.. تشوف شَعرِك بيلمع م الدّموع؟!
إيه ذنب شارع خدّك المليان بَراح؟!
إيه ذنب سبّابةْ إديكي وهيّ بتحُوش البكا؟!
إيه ذنب عود..
أوتارُه بدأت في الغُنا وسمعِك كده؟!
إيه ذنبها الدنيا اللي لـ عْيونِك فِدا؟!
إيه ذنب ناي بتشدِّي من جُوفُه الفضا؟!
أو ذنب حد تعيّطي بْدمعِك عليه..
سيبك بقا.. من كلِّ دا..
أنا ذنبي إيه؟!
شعر/ عبد الرحمن بخيت
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating