لو من مواليد سبتمبر
Read Time:1 Minute, 21 Second
لو من مواليد سبتمبر
يبقى اتعلمت
ان الإحساس اللي ما بين الصيف والشتا بيزوِّد شوق الحضن
وان دخول المدرسة يشبه لميلادك
وان الشمع حيولع بعد ما تطلع كعكة جميلة من الفرن
وان اللي اتلموا وبيغنوا عشانك
كانوا أجدادك وفي ثانية بقوا أحفادك
وانك راح تلبس مريلتك
مع أول سبت حييجي بعد ما يخلص موسم جمع القطن
لو من مواليد سبتمبر
لازم تحني الضهر
لأن لمونك الاصفر ساقط تحت الشجرة ولازم يتلم
وان زتون التخليل تلاقيه في الأزهر
بعد ما بتعدي مجموعة قلاوون
وان سماء ڤان جوخ موجودة هناك
فوق القهوة اللي قصاد الشباك
ابو شيش متكسر
اقعد ع القهوة واطلب شاي
واعرف
عبد الناصر حيموت
آخر الشهر
مع أيلول الأسود
وان الليلة حتقدم
وحتحكي لعيالك
ارجع للذكرى
واتقدم بخيالك
تلقى الأعياد جاية لك
وتزور سبتمبر
تعرف ان محمد أصغر منك باتناشر يوم
انتم عذراء وميزان
لكن نفس الشهر ونفس الأفراح والاحزان
تعرف إنك أكبر من بعض الناس بيومين وتلاتة واتناشر شهر وخمسين سنة أو خمسة وعشرين قرن
واصغر منهم برضة بنفس فروق السن
تعرف ان الناس في السجن
بيخلوا ميلادهم هو دخولهم ولغاية ما تفوت المدة
يرسموا منحنى تشريفهم في الزنازين
ع الجدران زجزاج
يعني الأبراج
تتعطل حتى يتم الإفراج
لو من مواليد سبتمبر
تبقى في قلبك دقات بتطب
وكانك منتظر الحب في قلبك على طول
يبقى حنينك جارف للمجهول
يبقى كلامك في عينيك جاهز وما تعرفش تقول
تبقى الطبطبة على ضهرك بتخلي الحزن يزول
تهرب من شمس المغرب وكأنك إنت المقتول
وتحب الفجر ونوره وما تصحاش
وتعيش في خيالك صور الماضي
وما تنساش
وتهاجمك في الحلم وشوش الموتى
وتقرب من موتك جدا وتعود
تستغرب معنى وجودك
وتشك انك فعلا موجود
وان الناس مواليد سبتمبر
يشبهوا كل المواليد.
شعر/ أمين حداد
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating