هشام طلعت.. لو كنت مسئول تخرجه تستفيد منه ولا يكمل سجنه ؟!

أغسطس 29, 2023أغسطس 29, 2023

Read Time:2 Minute, 22 Second

رد اعتبار هشام طلعت مصطفى:

الصورة كاملة بتقول ارتكب هشام طلعت مصطفى جريمة التحريض على قتل فنانة لبنانية عن طريق شخص كان بيشتغل معاه في شركته وتمت الجريمة في دبي.. والتحكم على الاتنين سنة ٢٠٠٩بالسجن ودفع هشام دية لابوها وفقا لما تم الإعلان عنه من المحكمة وقتها ٢٠ مليون جنيه.

وفي سنة ٢٠١٦ تم نقل هشام طلعت مصطفى للمستشفى لإجراء الكشف عليه من قبل المحكمة للبت في خروجه بدعوى الحالة الصحية، وتم إثبات أن صحته زي الحصان واترفض طلبه ورجع السجن.

المعلومات بتقول ان هشام ما سكتش وسعى في ٢٠١٧ لتقديم اي تبرعات وتعهد بالتزامات ماديه للخروج من السجن. مع تعهد بحسن السير والسلوك والمساهمة بخبرته وشركته في مشروعات التنمية في الدولة.

السؤال هنا: لو كنت مسؤول تخرجه بعفو وتستفيد منه كصاحب خبرة ومال في وقت الدولة محتاجة له بشدة؛ و لا تكمل سجنه؟

القرار وقتها كان العفو عن هشام اللي مع اول خروج له كان إعلانه عن الاستثمار في مشروعات كتيرة وده معناه ضخ رأسمال في السوق وتشغيل ايد عاملة وزيادة إمكانيات شركة مصرية ده غير تبرعه لصندوق تحيا مصر ومشروعات التعليم الفني.

الصورة كاملة بتقول: في مواد القانون الجنائي في مادة خاصة بما يعرف برد الاعتبار للمحكوم عليهم في جنح أو قضايا جنائية و نصت المادة بكل وضوح على إن: رد الاعتبار حق لكل محكوم عليه في جناية أو جنحة،

يعني اي انسان اتحكم عليه في أي قضية ممكن أن يرفع دعوى لرد الاعتبار مهما كانت القضية عشان يرجع يمارس حقوقه في المجتمع ولكن بشروط محددة.

اولها أنه يكون نفذ العقوبة أو صدر له عفو فيها ، تانيها أنه يكون حسن السير والسلوك بعدها ، تالتها أنه يكون التزم بدفع وسداد أي التزامات مالية نتجت عنها، رابعها أنه يكون فات ٦ سنين على خروجه من السجن .

مش بس كده، القانون نص على أن المحكمة من حقها ترفض أو تقبل دعوى رد الاعتبار وفقا لظروف القضية ومدى التزام المدعي بحسن السير والسلوك…وقال كمان أن رد الاعتبار لا يحق غير مرة واحدة بس للمدعي في حياته يعني لو ارتكب جريمة تانية يبقى ما يستاهلش…

وعشان كده مثلا رفضت المحكمة رد الاعتبار لجمال مبارك في قضية القصور الرئاسية ولخيرت الشاطر في قضية ميليشيات الأزهر وغيرهم.

امبارح قبلت المحكمة رد الاعتبار لهشام طلعت مصطفى، بعد كل اللي فات ده، اقبل أو ارفض ، لكن المحكمة طبقت القانون وبلدك ما اتدخلتش غير في العفو .

اللي فات كله مش بيناقش هو صح او غلط، اللي فات بيشرح قانون ثابت … يطبق على الكل..

اما بقى لو مثلا أترشح هشام طلعت مصطفى ونجحتوه في الانتخابات أيا كانت الظروف، عارض نجاحه فيها وهاجم اي حد يؤيده فيها وقول رايك وارفض تزاوج المال والسلطة رغم أنهم متجوزين في كل العالم، ده رئيس الوزراء البريطاني رجل اعمال محلل مالي وبتاع استثمار ، وترامب اللي حيرجع يحكم امريكا رجل اعمال ولما ودوه السجن يوم الخميس ما قعدش غير ساعتين ودفع ٢٠٠ الف دولار وخرج.

شخصيا،احترم حكم المحكمة اللي طبقت القانون، واعترض على ترشح هشام طلعت مصطفى لأي منصب أو في أي انتخابات.

بقلم/ نشوة الحوفي

كاتبة صحفية